ANG DIYOS: KAPUSO MO! : Reflection for 4th Day of Christmas Novena
Kung ang Diyos ay KAPAMILYA natin… Siya rin ay KAPUSO NATIN! (para walang away!) Kapuso sapagkat Siya’y mabait, mahabagin, mapagkalinga lalo na sa mga taong kapus-palad at sawi. Ito ang ipinakita Niya kay Elizabeth at sa asawa ni Manoa. Dininig Niya ang kanilang mga panalangin at pagsusumamo na pagkalooban ng anak. Inalis ng Diyos ang kanilang nakakahiyang kalagayan na nagiging sanhi upang kadustaan sila ng mga tao. Mula sa pagiging mababa… muli silang itinaas ng Panginoon. May mga pagkakataon na ang pakiramdam natin ay pinababayaan tayo ng Diyos. Madali tayong magtampo sa kanya. Hindi ganito ang ipinakita ng mag-asawang Elizabeth at Zacarias. Nanatili nilang kapuso ang Diyos. Sabi sa ebanghelyo: nabubuhay silang matuwid at masunurin sa mga utos ng Diyos! Kung nais nating makapuso ang Diyos ay dapat din tayong maging masunurin sa Kanya. Ang Diyos ay gagawa ng himala sa ating buhay at walang bagay na imposible na hindi kayang gawin para sa atin… naging KAPUSO Niya tayo noong tayo ay bininyagan… Nangako tayong magiging kapuso Niya sa pamamagitan ng pagtalikod sa kasalanan at pagsampalataya sa Kanya. KAPUSO ka pa rin ba Niya ngayon?
