WALANG KWENTA! : Reflection for 17th Sunday in Ordinary Time Year B - July 29, 2006
"Limang tinapay… dalawang isda… galing sa isang bata." Ang Panginoon nga naman… mapagbiro! Sinabihan niya ang mga alagad na paupuin ang mga tao. Sumunod naman sila… kahit marahil nagtataka kung ano ang gagawin niya. At nangyari ang isang himala. Nakakain ang lahat at may labis pa… Ito naman talaga ang "modus operandi" ng Diyos kapag nais Niyang ipadama sa tao ang Kanyang kapangyarihan. Gumagamit Siya ng maliliit… mahihina… walang kwenta! Upang ipakita na sa Kanya lamang nagmumula ang kapangyarihan! Kung minsan, manonood ako ng balita sa TV. Makikita ko ang paghihirap ng napakaraming tao. Nitong nakaraang mga araw… mga biktima ng karahasan ng digmaan sa Lebanon. Lagi kong tinatanong ang aking sarili… "anung magagawa ko para sa kanila?" Ako’y isang karaniwang mamamayan… maliit… mahina… walang kwenta! Tandaan mo ang modus operandi ng Diyos. Isang katulad mo ang paborito Niyang gamitin! Kaya wag ka lang manood sa isang tabi… may magagawa ka! Simulan mo silang isama sa iyong panalangin. Pairalin mo ang pagkukusa sa pagtulong sa mga nangangailangan. Iwasan mo ang pagiging makasarili sa halip pairalin mo ang pagiging mapagbigay… Tandaan mo tayong lahat ay parang "limang tinapay at dalawang isda…"
