PROYOUTH 1

Isang mayamang matanda ang lumapit sa pari at hiniling na misahan ang kanyang namatay na alagang aso. Tumanggi ang pari at sinabing hindi maaaring alayan ng misa ang hayop.  "Ganoon po ba Father, sayang… 1 milyon pa naman ang ibabayad ko. Di bale, sa simbahan ng aglipay ko na lang siya pamimisahan."  Biglang napasigaw ang pari: "Ginang… hindi puwede yan!!! Katoliko ang aso mo!"  Ano nga ba ang ibig sabihin pag sinabing Katoliko ka?  Sabi raw nila… tayong mga Katoliko ay may "katok" na "liko" pa!  Papayag ka ba?  Ano nga ba ang ibig sabihin ng salitang "Katoliko" na nakakabit sa ating pangalang Kristiyano?  Makikita ba ito sa Bibiliya?  Kung si Bro. Eli ang tatanungin, ang sagot ay hindi!  Hindi naman kasi tagalog ang salitang Katoliko. Ito ay galing sa salitang Griego na ang ibig sabihin ay "universal"  o para sa lahat!  Sapagkat malakas ang ating paninindigan na ang kaligtasan ay ibinibigay ni Kristo para sa lahat… Kristiyano ka man o hindi.  Ang langit ay hindi lamang para sa ilang grupo katulad ng pag-aangking ginagawa ng ibang sekta.  Sa unang pagbasa at  Ebanghelyo makikita natin ang tema na ang biyaya ng Diyos ay malaya niyang ibinibigay kahit kanino. Ganito rin ang kaligtasang alay ni Jesus… walang pinipili!  Para sa lahat!  Kaya nga’t kasalanan na natin kung tatanggihan natin ang Kanyang alok. Sana ganito rin tayo sa ating pagpapakita ng pagmamahal sa iba… walang pinipili! Ang magmahal ay para sa lahat!  Hindi lang para sa mga kaibigan pero para rin sa mga kaaway. Nawa maging bukas ang ating isipan at puso sa pagtanggap sa iba at sa pagpapakita ng ating pagmamahal sa kanila.  Katoliko ka ba?  Magmahal ka…

Sino nga ba ang itinuturing na dakila?  Ang sabi ng mundo… pag mayaman ka dakila ka! Pag nasa kapangyarihan ka dakila ka!  Pag may cellphone kang 3G… sikat ka!  Kapag naka-ipod ka… sosi ka!  Kapag may wheels ka… Ok ka!  Tama ba ito?  E papaano kung ang cellphone ko ay Nokia 5110?  Ang sounds ko walkman cassette pa rin?  Ang wheels ko… commute lang sa jeep at tribike?  Kawawa naman ako kung ganun…  Ganito rin ang pag-iisip ng mga alagad ni Jesus.  Dakila tayo kasi kasama natin ang Panginoon.  Dahil sikat siya… sikat din tayo!  Darating ang araw mauupo tayo sa kanyang tabi sa palasyo…  "Eeeeng!  Mali ata kayo mga tol…" sabi ni Jesus.   Kumuha siya ng maliit na bata at ginawang halimbawa sa kanila… "Ang nais sa inyong maging dakila ay dapat matutong maglingkod…" Wow!  Parang tinamaan ng mag-asawang sampal ang alagad.  Hindi ata ganun ang kanilang iniisip.  Ngunit ipinakita ni Jesus ang tunay na kadakilaan.  Hindi lang sa salita ngunit higit sa lahat sa gawa. Si Jesus ay ang Panginoong naglilingkod.  Paglilingkod na humantong sa pag-aalay ng kanyang buhay upang tayo ay mailigtas sa kasalanan.  Nauunawaan ko ba ito bilang Kristiyano?  Kung lahat lang sana tayo ay katulad ni Jesus sa ating pagpapakita ng "kadakilaan", marahil mababawasan ang kasamaan sa ating lipunan.  Mababawasan ang mga corrupt sa pamahalaan, ang mga mapagsamantalang politiko, ang mga makasariling lider… etc.  Higit sa lahat magiging kalugod-lugod ka sa Diyos.  Gaya ng sinasabi sa aklat ni Sirac: "Habang ikaw ay lalong nagiging dakila, lalong dapat kang magpakababa, sa gayo’y kalulugdan ka ng Panginoon…"

Sa isang religion class ay tinanong si Erap:  "Ano ang pangalan ng Diyos?"  Agad sumagot ang bibong-bibong si Erap: "Harold po…" Galit na nagtanong uli ang sister: "Bakit Harold?  San mo nakuha ang pangalang yon?" Sagot ni Erap: "Sister, di po ba dinarasal natin everyday… Our Father in heaven HAROLD be thy Name…"  Sino nga ba ang Diyos?  Ito rin ang tanong ni Jesus sa mga alagad:  "Who do people say that I am?"  Maraming survey result na sinabi ang mga alagad na pampapogi points para kay Jesus… "Ikaw daw si Juan Bautista… Ikaw daw si Propeta Elias…"  Pero di bilib si Jesus sa survey… "But who do you say that I am?" Nagulat ang mga alagad… nasorpresa sila ni Jesus.  Lagi nilang kasama si Jesus pero di nga nila alam kung sino ba talaga Siya…  Mabuti na lamang at napuspos ng Espiritu Santo si Pedro: "Ikaw ang Mesiyas!" (ibig sabihin ay Tagapagligtas!)  Matagal na nating kasama si Jesus.  Sa katunayan ay tinaglay pa natin ang alyas niya (Kristo) sa ating pangalan bilang "KRISTIyano.  Pero kilala ba natin siya?  Sino ba ako para sa iyo?  Magandang tanungin kung anung klase ng Diyos mayroon tayo sapagkat ito ang magbibigay ng kahulugan sa ating buhay.  Kung ang Diyos natin ay parang "pulis" na laging nagbabantay ay katatakutan natin Siya imbis na mahalin.  Kung ang Diyos natin ay parang "accountant" na naglilista ng ating "debit" at "credit" ay susukatin natin parati ang ating buhay sa mga nagawa nating mabuti at masama at malilimutan na ang personal na pakikipag-ugnayan sa Kanya.  Maganda ang sagot ni Pedro:  "Ikaw ang Mesiyas!"  Talaga bang tinanggap ko na sa aking buhay si Jesus bilang aking tagapagligtas? Wala pa tayong muwang noong tayo ay  bininyagan…  ngunit ngayon malalaki na tayo! Alam na natin ang ibig sabihin ng pagpili sa Diyos… alam na natin ang kahihinatnan ng ating pagpili…  Seryosohin natin ang ating pagiging Kristiyano… Sino ba si Jesus para sa ‘yo?

Isang batang retarded na pipi at bingi ang umakyat sa isang mataas na puno ng niyog.  Nakita siya ng maraming tao at pilit siyang pinabababa sa pangambang siya ay mahulog.  Ngunit ayaw bumaba ng bata.  Tumawag sila ng tulong sa mga baranggay tanod pero bale wala lang bata.  Tinawag na nila ang kapitan ng baranggay ngunit nagmistulang tanga lamang ang kapitan… ayaw bumaba ng bata.  Nagkataong napadaan ang parish priest ng lugar.  "Father, kayo na nga ang magpababa.  Baka sa inyo sumunod."  Napilitang sumunod ang pari.  Lumapit sa puno.  Tumingala sa itaas at iwinasiwas ang kamay na tila nagbabasbas sabay bulong ng ilang salita.  Agad-agad ay bumaba ang bata.  Laking gulat ng mga tao at manghang-mangha sa pari.  "Ang banal talaga ni Father! Binasbasan lanng ang bata… solve na!"  Tugon ng pari: "Anung binasbasan? Sinabi ko sa bata… Hoy bata!  Ikaw baba o putol puno… baba o putol puno!"  hehehe… Ang hirap talagang kausapin ng taong may ganitong kapansanan. Kung minsan ay maawa ka na lang sa kanilang kalagayan.  Ngunit may isa pang pagkabingi at pagkapipi na mas masahol pa sa pisikal na kapansanan at ito ang nais ni Hesus na ating tugunan.  Sa ebanghelyo, narinig nating hinawakan ni Jesus ang lalaki. Jesus touched the ears and tounge of that person and he got healed.  The touch of Jesus brings healing because it is the touch of God’s love!  We are also called to touch the hearts of people who are spiritually deaf and mute. Kapag nakikiramay ka sa isang taong nagdadalamhati, kapag pinatatawa mo ang kaibigan mong malungkot, kapag pinapatawad mo ang mga nagkakamali sa yo… hinihipo mo ang puso nila… You are bringing healing in their hearts… you are touching them with God’s love… Dapat ganito tayong mga Kristiyano… "Touching lives…"

"Panginoon, maraming salamat po at binigyan mo ko ng mabilis na paa.  Nang-agaw ako ng
cellphone at hindi ako nahuli!  Salamat Paniginoon…"  ang dasal ni Juan sa harap ng isang malaking krus sa isang simbahan.  At meron syang narinig na tinig… "Mapalad ka Juan mapalad ka!"  Laking pagkagulat ni Juan ng marinig ang tinig at nagtanong: "Panginon, anung ibig sabihin mong mapalad ako?"  Sagot ng tinig sa kanya "Mapalad ka Juan… nakapako ang mga kamay at paa ko… kung hindi binatukan at tinadyakan na kita!" hehehe…  Kwento lang yun! Di naman nangbabatok at nanadyak si Jesus ngunit alam nating galit siya sa mga taong mapagpa-imbabaw!… Sa mga taong nag-aakalang sila’y banal sapagkat labas-pasok sa loob ng Simbahan… Sa mga taong memorize ang kabanata at talata sa Bibiliya ngunit patuloy sa paninira sa kapwa!… sa mga taong sumusunod sa mga utos ng Diyos ngunit wala naman sa puso ang pagtalima dito.  Hindi binabalewala ni Jesus ang mga kautusan at kagawian ng mga tao.  Ang hindi niya matanggap ay ang hindi tamang pagsasabuhay ng batas na nagiging sanhi ng lalong paghiwalay ng tao sa Diyos.  Ito ang sabi ni Propeta Isaiah sa mga taong iyon: "This people honors me with their lips, but their hearts are far from me…" Ang batas ay ibinigay ng Diyos sa ating mga tao upang makamit natin ang kapayapaan, kaligayahan at kaayusan ng pamumuhay hindi upang maging pabigat at pasanin! Ang tunay na pagsamba sa Diyos ay hindi nakikita lamang sa panlabas kundi nasa kalooban ng bawat taong tunay na nagmamahal sa Diyos at sa kanyang kapwa!
  "Paano ko ba isinasabuhay ang aking pananampalataya?  Paano ko sinusunod ang mga utos ng Diyos?  Baka isang araw batukan at tadyakan na lang ako ng Panginoon…